دی سپر لیڈ ڈاٹ کام ، اسلام آباد۔ درمیانی راستہ ، فیس سیونگ اور نظریہ ضرورت کا راستہ بند، سپریم کورٹ نے تاریخی فیصلہ سنا دیا، ڈپٹی سپیکر کی رولنگ اور عمران خان کے اقدامات غیر آئینی قرار دے دیئے گئے ۔
دی سپر لیڈ ڈاٹ کام کے مطابق سپریم کورٹ نے آئین کی بالادستی کا جھنڈا لہرا کراصل سرپرائز دے دیا۔ ڈپٹی سپیکر کی رولنگ آئین سے متصادم قرار دے دی گئی ۔ عمران خان کے تین اپریل کے بعد تمام احکامات کالعدم قرار پائے ۔ قومی اسمبلی کی حیثیت بحال ہو گئی ۔ جلد بازی میں عمران خان کی صدر کو بھیجی گئی ایڈوائس بھی کالعدم قرار پائی ۔ عدالت کے مطابق تحریک عدم اعتماد پر ووٹنگ ہفتے کی صبح دس بجے ہوگی ۔ تحریری فیصلے کے مطابق کسی ممبر کو ووٹ ڈالنے سے روکا نہیں جائے گا۔ سپیکر تحریک عدم اعتماد نمٹانے تک اجلاس بھی موخر نہیں کر سکیں گے ۔ آرٹیکل تریسٹھ اے پر عدالتی فیصلے کا کوئی اثرنہیں پڑے گا۔ تحریک عدم اعتماد منظور ہو جاتی ہے تو ایوان نئے وزیراعظم کا انتخاب کرے گی ۔ اعلیٰ عدالت نے 8صفحات پر مشتمل متفقہ فیصلہ سنایا جس پر اپوزیشن کے وکلا نے احاطہ عدالت میں ہی جشن منایا۔