دی سپرلیڈ ڈاٹ کام ، بہاولپور: بجلی چوری کے خلاف کارروائی کے دوران پولیس ٹیم کی جانب سے ایک گھر پر چھاپے کے بعد اہل خانہ کی مبینہ مزاحمت اور پولیس کے رویے کے خلاف گھر کی ایک لڑکی کا ویڈیو بیان سامنے آگیا۔
پولیس ریکارڈ کے مطابق بہاولپور میں بجلی چوری کے خلاف کارروائی کے دوران متعلقہ گھر میں غیر قانونی طور پر بجلی استعمال کیے جانے کی اطلاع پر چھاپہ مارا گیا۔ پولیس کا مؤقف ہے کہ کارروائی کے دوران اہل خانہ کی جانب سے مزاحمت کی گئی، جس کے بعد واقعے سے متعلق مقدمہ بھی درج کرلیا گیا۔
واقعے کے بعد گھر کی ایک لڑکی نے ویڈیو پیغام جاری کیا جس میں اس نے پولیس کے مبینہ رویے پر احتجاج کرتے ہوئے الزام عائد کیا کہ پولیس اہلکاروں نے اس کے والد کو تشدد کا نشانہ بنایا۔ لڑکی کا کہنا تھا کہ کسی شہری کو مارنا غیر قانونی ہے اور پولیس کو قانون کے دائرے میں رہتے ہوئے کارروائی کرنی چاہیے۔
تاہم واقعے کی ایف آئی آر میں پولیس کی جانب سے مختلف مؤقف اختیار کیا گیا ہے۔ پولیس کے مطابق مذکورہ گھر میں بجلی کی چوری اور غیر قانونی استعمال کا معاملہ موجود تھا اور کارروائی کے دوران مزاحمت بھی سامنے آئی۔
دلچسپ امر یہ ہے کہ سامنے آنے والے ویڈیو بیان سے بظاہر یہ تاثر بھی ملتا ہے کہ گھر میں بجلی کے غیر قانونی استعمال کا معاملہ موجود تھا، تاہم بجلی چوری کے الزام اور پولیس کی کارروائی سے متعلق حتمی حقائق کا تعین تفتیش اور قانونی کارروائی مکمل ہونے کے بعد ہی ہوسکے گا۔
واقعے نے ایک جانب بجلی چوری کے خلاف جاری کارروائیوں اور دوسری جانب چھاپہ مار کارروائیوں کے دوران پولیس کے طرزِ عمل سے متعلق سوالات اٹھا دیے ہیں۔ اب یہ معاملہ تحقیقات کا متقاضی ہے کہ کارروائی کے دوران پولیس اور اہل خانہ کے درمیان اصل میں کیا پیش آیا اور دونوں جانب سے عائد الزامات میں کتنی صداقت ہے۔
دی سپرلیڈ ڈاٹ کام کو دستیاب پولیس دستاویز کے مطابق واقعے کا مقدمہ درج کیا جاچکا ہے، جبکہ مزید قانونی کارروائی جاری ہے۔
