دی سپر لیڈ ڈاٹ کام ، لاہور۔ لاہور میں میٹرو بس سروس بند، ڈرائیوروں اور عملے کے مطالبات کیا ہیں ؟وجوہات سامنے آگئیں ۔
سپر لیڈ نیوز کے مطابق لاہور میں میٹروبسوں کا پہیہ پھر رک گیا ہے ۔ ڈرائیورز نےواجبات کی عدم ادا ئیگی پر ایک بار پھر ہڑتال کردی۔ بسیں بند ہونے کے باعث شہری شدید پریشانی کا شکار ہیں ۔ زائد کرایہ بھرکر دوسری ٹرانسپورٹ پر سفر کرنے پر مجبور ہیں ۔ ذرائع کے مطابق تمام بسیں گجومتہ ڈپو اور شاہدرہ اسٹیشن پر کھڑی ہیں ۔ ہفتے کے روز ٹریک پر احتجاج کر تے ہوئے ملازمین نے انتظامیہ کے خلاف نعرے لگائے ۔ ڈرائیورز نے بتایا حکومت مسلسل انہیں چکما دے رہی ہے ۔ حکومت کا ترک کمپنی کے ساتھ معاہدہ ختم ہوگیا ہے لیکن ہمارے واجبات نہیں دیئے جارہے ۔
انہوں نے کہا کہ موجودہ حکومت کبھی فنڈز کی قلت کا بہانہ بناتی ہے تو کبھی ترک کمپنی پر الزام دیتی ہے ۔ معاملے پر سیاست چمکائی جارہی ہے ۔ ہمارے گھروں میں فاقے چل رہے ہیں ۔ مہنگائی کے دورمیں ویسے ہی جینا محال ہے ۔ ایسے میں حکومت الاؤنسز نہیں دینا چاہ رہی ۔ اس موقع پر بعض ڈرائیورز نے عوام سے معذرت کی اور کہا کہ وہ بس سروس بند کرنے پر مجبور ہیں ۔ عوام سے معذرت کرتے ہیں مگر احتجاج کے سوا کوئی راستہ نہیں بچا حکومت بات ہی سننے کو تیار نہیں ۔